Miguel Sotelo

Redes sociales

Youtube
Facebook
LinkedIn
Twitter
Google+

Miguel Sotelo é bailador e mestre de baile tradicional.

Realizou o curso "Bailas? Didáctica da danza tradicional galega" na Universidade de Santiago de Compostela e, actualmente, está cursando "Antropoloxía social e cultural de Galicia: etnografía, patrimonio inmaterial e etnoarqueoloxía. Unha viaxe antropolóxica pola cultura e sociedade tradicional galega." na UNED en Pontevedra.

Exerce a función de director en varias agrupacións ao longo destes últimos anos:
en Trébede (O Morrazo) e na A.C. Retrouso de Cela (Bueu), nos cales tamén participa como bailador, e no grupo de danzas Ximalveira do Hío (Cangas). Amais é director do grupo infantil da A.C. Lembranzas da Ría ata o 2012.
Así mesmo, imparte clases de baile tradicional galego na A.C. Peis d’hos e na A.C. O Arco de Vilanova (O Hío), ambas de Cangas, na A.C. Moañesa de Música e Danza de Moaña e na A.C. Trepia de Pontevedra.

Ao longo destes anos, leva a cabo varios cursos de baile en diversas asociacións e en Centros Galegos. Ademais, imparte seminarios de baile tradicional galego fóra de Galicia e no estranxeiro en colaboración coa Secretaría Xeral de Emigración da Xunta de Galicia.

Asume a dirección artística da curtametraxe IREI A DARBO.

Como bailador forma parte de varios proxectos escénicos que teñen como base a música e/ou o baile tradicional galego:
a compañía de música e danza GS21, a compañía de danza e música Circio, a compañía de danza Quique Peón Cía (coa que acada un premio nacional de danza no XXI Certame de coreografía de danza española y flamenco 2013 en Madrid) e o Projecto ['trepia], do cal é membro fundador participando como músico e bailador (co que acada varios premios GzCrea, no I Encontro Galego da Música Emerxente e no FestiMadTaste en Madrid). Tamén é compoñente do grupo de pandereteiros O Tear de Llerena.

É socio da A.C. Lembranzas da Ría dende o ano 2003, onde se inicia como bailador e músico. Máis tarde pasa a formar parte da A.C.F. O Fiadeiro de Vigo.
Dende entón, amplía os seus coñecementos asistindo a numerosas clases cos mellores mestres de baile tradicional galego.
Dende 1994, participa na Danza e Contradanza de Darbo.

Imagen: 

Todos los derechos reservados - Miguel Sotelo